Windpompfees nuwe datum vir volgendejaar: 21-23 Maart 2013

Die Limpopo Windpompfees wat vanjaar by Euphoria Golf Estate & Hydro Resort aangebied is, was ‘n reuse sukses! Mense het in hulle duisende van heinde en verre gestroom om die grootste fees in die Limpopoprovinsie by te woon! Twee wêreldrekords is tydens die fees opgestel. Op 27 April is die braai van die langste boerewors se vorige rekord van 514,50 verbeter tot ‘n ellelange 630,3m – ‘n verbetering van 115,8m. Om hierdie wors te maak, is 277kg beesvleis, 95kg varkvleis, 20kg speserye en 10 bondels derms van 55m elk gebruik en ongeveer 40 lede van die DLU en Afriforum moes hand bysit om die wors op die rooster te pak! Hierdie inisiatief is deur Potgietersrus DLU en Afriforum Jeug geloods. Dit het mnr Waltie van der Walt en sy span van Meat City Potgietersrus 9 ure geneem om die wors te maak! Na afloop van die braai het pensioenarisse en feesgangers heerlik daaraan gesmul!